Novas

25-02-2019 -

O Concello promove novos cursos de intelixencia emocional para o alumnado dos centros educativos de Fene

A concelleira de Ensino, Ana Novo, explicou esta mañá que, tralo éxito acadado na primeira edición, o Concello decidiu reeditar os cursos de intelixencia emocional para nenos e nenas de Educación Primaria e ESO. Por iso, mañá martes 26 de febreiro, e ata o 5 de marzo, abrirase o prazo de inscrición no programa. Poderá formalizarse en días laborables en horario de 9 a 14 horas no departamento municipal de Ensino do Concello –Avenida de Naturais, 44, entresollado-. O custe da actividade é de 10,90 euros.
25-02-2019 -

A unidade móbil de doazón de sangue desprázase a San Valentín este luns

A unidade móbil de doazón de sangue desprazarase este luns 25 de febreiro a San Valentín. Permanecerá diante da farmacia en horario de tarde –de 15,30 a 21 h- e, dende o Concello, anímase á veciñanza a tomar parte na campaña de doazón.
 
22-02-2019 -

O Concello convida este domingo á veciñanza a celebrar o Día de Rosalía cunha degustación do Caldo de Gloria

A concelleira de Cultura, Rocío Bértoa, convida a veciños e veciñas a celebrar este domingo 24 o Día de Rosalía achegándose a partir das 12 horas aos xardíns que levan o nome da escritora en Perlío e participando da programación deseñada polo Concello. Arrancará coa ofrenda floral, e o grupo de teatro Xosé María Pérez Parallé do CMI Unidade de Fene recitará poemas da escritora. De seguido, actuará o Tradicoro, que interpretará poesías de Rosalía e, ao remate, o alcalde, Gumersindo Galego, pronunciará unhas palabras. Sobre as 12,30 h, a praza da escola do Ameneiral será o escenario central onde o Concello convide á veciñanza a unha degustación popular do “Caldo de Gloria” segundo a receita que a propia Rosalía legou no seu poema “Miña casiña, meu lar”. Ademais, e ao longo da toda a mañá, realizarase un bookcrossing na parroquia de Perlío de 50 libros de Rosalía.
22-02-2019 -

Fene acolle este domingo a cuarta xornada da I Liga de Judo Norte

O concelleiro de Deportes, Xoán Manuel Bastida, informou esta mañá de que Fene albergará o domingo 24 de febreiro a cuarta xornada da I Liga de Judo Norte para as categorías de alevín e infantil. A cita deportiva desenvolverase no pavillón de A Xunqueira, a partir das 10 horas, e nela tomarán parte uns 200 judokas.
21-02-2019 -

Presentación da VI Festa Mariñeira e do II Festival das Ondas con degustación de tapas de mar e a música de A Tribo das Flores

O concelleiro de Promoción Turística de Fene, Juan José Franco, convidou esta mañá á veciñanza a tomar parte este sábado 23 de febreiro nunha nova proposta de lecer do programa municipal “Vén a Fene”. Nesta ocasión, á parroquia de Barallobre. Alí, a partir das 19 horas e no local da Liga de Amigos de Barallobre, celebrarase o acto de presentación da VI edición da Festa Mariñeira e do II Festival das Ondas. Presidido polo alcalde, Gumersindo Galego, e coa participación do edil de Promoción Económica, César Castro, e do propio Juan José Franco, a entrada é libre.
20-02-2019 -

Preto de 680 alumnos e alumnas de Fene, Mugardos e Neda participan en Cinensino

Un total de 679 alumnos e alumnas de 13 centros educativos dos municipios de Fene, Mugardos e Neda participan dende este mes e ata marzo no programa Cinensino que impulsan os tres concellos ao abeiro do proxecto de prevención de condutas aditivas e promoción da saúde no eido local e co apoio da Consellería de Sanidade.
 
20-02-2019 -

O Concello de Fene conclúe as obras na rede de saneamento e pavimentación do camiño do Cádavo ás Chancas

O Concello de Fene vén de concluír as obras de adecuación e mellora do camiño do Cádavo ás Chancas, na parroquia de Perlío. Unha intervención que precisou dun investimento de 73.771 euros procedentes do POS+ 2017.
19-02-2019 -

O pleno do Concello de Fene aproba a súa adhesión ao Pacto de Alcaldes Polo Clima e a Enerxía

O Concello de Fene ven de acordar en pleno a súa adhesión ao Pacto dos Alcaldes polo Clima e a Enerxía, asumindo así os compromisos da Unión Europea en materia de clima e enerxía para o ano 2030. O Pacto foi lanzado en Europa no ano 2008, e implica xa a case 8.000 autoridades locais pertencentes a 57 países de todo o mundo, está coordinado en Galicia pola Xunta, a través da Consellería de Medio Ambiente, Territorio e Vivenda.
19-02-2019 -

Conclúen as obras para poñer fin ás inundacións no peirao de Barallobre

O alcalde de Fene, Gumersindo Galego, informou do remate das obras para poñer fin aos anegamentos que, ata a data, se viñan rexistrando nas vivendas da zona baixa da Ribeiroa, no peirao de Baralllobre. Os traballos contaron cun orzamento de 9.000 euros e consistiron na renovación das canalizacións do río nun tramo de 10 metros, coincidente co treito final.
18-02-2019 -

Charla sobre alzheimer no CMIU de Fene

O salón de actos do CMI Unidade de Fene albergará este martes 19 de febreiro unha charla informativa sobre alzheimer a cargo de AFAL Ferrolterra. A ponencia, que dará comezo ás 18,30 horas con entrada de balde, está organizada pola entidade social en colaboración co CMI e o departamento municipal de Servizos Sociais do Concello.